domingo, 4 de decembro de 2016

Remata a aventura CAFI_PLE_2016

Avistamos terra despois de semanas navegando a un ritmo constante e deixando tras de nós un ronsel marabilloso entretecido por todas e todos: compañeiras e compañeiros de curso e profesores.

Lembro que alá por setembro entrei un día en FProfe buscando algún curso PLATEGA que me puidese aportar algo nisto das TIC aplicadas á educación, ámbito no que recoñezo que me estou a converter nunha auténtica friki porque vexo multitude de oportunidades comunicativas que, ademais, lle encantan ao meu alumnado.

Comezou o curso e unha das primeiras tarefas que tivemos que facer foi describir o noso PLE. Este que vedes na imaxe era o meu. O titor valorouno como moi completo, e eu pensei: "Se está moi completo, non sei se vou aprender moito neste curso". Afortunadamente, equivoqueime nesta primeira e apurada valoración, porque, ademais de coñecer recursos novos como SocialWire, por exemplo, ao que lle vexo multitude de aplicacións na aula, o traballo colaborativo que fomos tecendo entre todos os membros do grupo foi absolutamente enriquecedor.

Módulo a módulo e tarefa tras tarefa tivemos que poñer en práctica grande cantidade de ferramentas diferentes e todas, dunha maneira ou outra, son moi útiles para a miña práctica na aula como docente de Lingua e literatura galega (Blogger, Twitter, Wordpress, Drive etc.).

Un dos meus módulos favoritos foi o da curación social de contidos, porque me gorneceu de ferramentas que non coñecía ou non usaba por non verlle o uso na aula. Agora, en cada proxecto de investigación co alumnado, unha das tarefas que faremos en común será precisamente esa, moi acorde, ademais, co desenvolvemento do sentido crítico.

Quédanme por facer dúas últimas reflexións. A primeira delas é para agradecer aos titores o seu bo traballo ao longo do curso, solucionando dúbidas case de inmediato e atentos aos prazos e dificultades que foron xurdindo. Podo dicirvos que me sentín moi ben acompañada neste camiño. Grazas.

E para rematar, unha doce lembranza para as compañeiras e compañeiros de curso: foi un pracer coincidir convosco, grazas por compartir e colaborar tan positivamente para tecer esta rede PLE. A Temi tiven a sorte de desvirtualizala onte na xornada EscolaTAC 2016, a todas e todos os demais agardo poder ir facéndoo devagariño noutros cursos ou nos centros.

Un pracer!

PD: Para cando un CAFI_PLE Avanzado??

domingo, 20 de novembro de 2016

Docente en obras: a curación de contidos

Sempre tiven claro que o labor docente precisaba dunha constante anovación que a acompasase cos fluír dos tempos. Isto lévame habitualmente a acudir a congresos e cursos de formación coma este no que agora estou traballando, titulado "Ambientes persoais de aprendizaxe e redes sociais na educación".

Imaxe de Fer Muñoz
O módulo desta semana versa sobre a curación de contidos, unha tarefa moi próxima ao labor docente máis tradicional, dado que consiste en buscar recursos e información sobre aquilo que teñas que traballar na aula co teu alumnado, seleccionar aquilo que nos interesa e compartilo co noso alumnado. De sempre ese foi un dos roles do docente, ou non?

A Web 2.0 veu abrirnos infinidade de fiestras ao mundo polas que, se queremos, pode entrar moitísima información. A curación de contidos vén axudarnos precisamente a filtrar e clasificar toda esa información dispoñible para despois poder compartila. Interesante, non?

Para iso podemos empregar diferentes ferramentas como Symbaloo, Storify ou Pinterest. Habitualmente traballo coa primeira, pero para facer a práctica deste módulo do curso tiven que empregar Pinterest. Esta ferramenta, malia que a coñecía, nunca cheguei a utilizala por estar moi cómoda coa outra, Symbaloo. Xa se sabe que é difícil saír da zona de confort!!

Recoñezo que Pinterest foi toda unha descuberta por ser moi útil, versátil e visual. Hai infinidade de recursos compartidos por outra xente e podes atopar practicamente de todo. Ademais, o feito de que admita diferentes formatos (texto, imaxe, vídeo...) é unha característica moi interesante.

Déixovos unha infografía que atopei nun pin sobre o tema e que recolle moi ben a importancia desta práctica no noso labor docente:



Un saúdo!!

mércores, 12 de outubro de 2016

CONTAMOS CON eMOTION: UN PROXECTO COLABORATIVO E INTERDISCIPLINARIO

Hoxe gustaríame falarvos de “Contamos con eMotion” e animarvos a participar nun proxecto de narrativa dixital que fomenta valores fundamentais para o ensino e a vida, como son, por exemplo: a literatura, a creatividade, a colaboración, a interdisciplinariedade, o uso responsable das tecnoloxías da información e a comunicación e os valores cívicos.
Logo do proxecto

Este proxecto nace o curso pasado nas creativas mans de Luz Beloso, docente de Educación Plástica e Visual do IES As Barxas (Moaña, Pontevedra), e Juan Carlos de Miguel Sanz, docente de Música e asesor TIC en Segovia. A idea orixinaria viña reivindicar dúas cousas:
- a necesidade de aumentar a presenza das Artes no ensino, gravemente danadas na vixente lei educativa;
- a figura de Miguel de Cervantes e o seu personaxe máis coñecido, don Quixote, na conmemoración do IV Centenario do seu pasamento.

Debo recoñecer que nun primeiro momento me sumei a este proxecto pola miña amizade persoal con Luz, á que quero e admiro moitísimo. Pero cando fun vendo todo o universo creativo que fomos tecendo dende latitudes ben diferentes -e con enfoques moi diversos-, sentinme na casa. E tiven esa sensación tan confortable porque me gusta compartir inquedanzas, soños, prácticas de aula, coñecementos e dúbidas; e este proxecto está feito de docentes así: diferentes países, continentes e linguas; diferentes materias, proxectos e enfoques moi variados dunha idea común... D I V E R S I D A D E !!! Unha das miñas palabras favoritas!!

Comezamos poñendo en común produtos que fixeramos anteriormente, polo que eu compartín e expliquei a stop motion light que realicei no curso 2013-2014. Velaquí a tedes:



No terceiro trimestre realicei dous proxectos stop motion e, malia que un aínda está sen rematar por problemas técnicos que estamos tratando de solucionar, puiden aportar estoutro:



Esta produción tan sinxela ten tras de si unha carga emocional importante que a alumna de 1º de Bacharelato quería compartir a través dunha narración dixital.


E este curso que? Este curso tamén temos proxecto. Xa estamos inscritas e inscritos 70 docentes. E con este artigo quería aproveitar a ocasión que me ofrecía a tarefa para dárvolo a coñecer (se non sabiades del) e animarvos a participar. Temos liberdade absoluta de tempos, formas, formatos, temáticas etc. Para máis información, podedes visitar o blog e a páxina de Facebook.

Agardámosvos!!

luns, 8 de febreiro de 2016